أساسيات الرسم: تدريب على رسم الأشكال بالخطوات
من أساسيات الرسم إننا نقدر نحدد شكل أي حاجة بنشوفها ونرسمه بسهولة، وفي عناصر مُعقدة بتحتاج إننا نحللّها لأكتر من شكل. بس خلينا نبدأ بأشكال بسيطة وواضحة ونتعلّم نرسمها بشكل ثلاثي الأبعاد مع تطبيق قواعد النور والظل عليها.
الأدوات اللي هنحتاجها، أقلام رصاص، أستيكة الفحم، ورق كانسون
تجهيز العنصر اللي هنرسمه وهو “بيضة”، هنحطها على ورقة أو قطعة قماش لونها أبيض وكمان الخلفية يكون لونها أبيض، ومصدر إضاءة ثابت نختار له زاوية معينة.
:خطوات الرسم
أولاً| تحديد العلامات: عشان نكون عارفين المساحة اللي هنشتغل عليها على الورقة قبل ما نرسم أي حاجة
ثانياً| رسم التخطيط أو الأوت لاين: بخط خفيف نوصل بين العلامات ونتأكد من الزاوية الصحيحة اللي بنرسم منها، هل البيضة بشكل أُفقي أو في ميل بسيط؟ المحور –الخط اللي في النص- اللي بنرسمه بيساعدنا نحدد الزاوية دي.
الخطأ الشائع إننا نرسم الأوت لاين غامق، هيبقى صعب نعدّل عليه أو ندمجه في الخطوات الجاية.
ثالثاً| تحديد مناطق الظل والنور: الخطوة دي محتاجة تركيز وقوة ملاحظة، ركزوا في أغمق جزء من البيضة وحددوه بلون غامق، بحيث نقسم الرسمة لظل ونور بس ونقدر نميّزهم عن بعض. طبعاً هيكون الجزء الغامق هو البعيد عن مصدر الضوء بالإضافة لظل البيضة على سطح الورقة اللي تحتها.
لازم ننتبه إن شكل الظل ومكانه بيتغيّر لو اتغير اتجاه أو قوّة مصدر الضوء
رابعاً| تظليل الخلفية: عشان نبرز البيضة –لأنها فاتحة- لازم نغمّق الخلفية، ورغم إننا بنرسم بالرصاص لازم نختار درجات فاتحة تُوحي بإن البيضة لونها أبيض.
الخطأ الشائع إننا نبدأ بتظليل غامق جداً، حتى وإحنا بنحدد مناطق الظل لازم نتحكم في القلم ونبدأ بدرجة فاتحة، وفي كل خطوة أو طبقة بنرسمها نزوّد درجة أغمق بالتدريج.
عشان كدا لا يُفضّل إننا نستخدم المنديل أو أدوات الدمج والتسييح في البداية واحنا بنتدرب، عشان نتعلّم ازاي وامتى نضغط على القلم عشان نوصل للدرجة المطلوبة.
خامساً| المرحلة الأخيرة: الشخص اللي بيرسم بس يقدر يحدّد امتى تنتهي، على قد ما تقدروا ركزوا في التفاصيل والفرق بين درجات الظل والنور، طبعاً البيضة أسهل حاجة ومفيش فيها تفاصيل كتير، بس ممكن رسمها يحتاج ساعة مثلاً للمبتدئين أو حد أول مرة بيرسم.
تقدروا تكرّروا التدريب دا لحد ما تكونوا متمكّنين منه، وبعدين استخدموا أي حاجة تانية شكلها مختلف وارسموها من زوايا مُتعدّدة وغيّروا اتجاه مصدر الضوء. كل ما يكون في تطور اختاروا أي حاجة فيها تفاصيل أكتر واتدربوا على رسمها. ملاحظة: الرسم من رسمة تانية مش مفيد ومش بيساعد على تحسين المستوى زي ما ترسموا حاجة شايفينها قدامكم
Aucun commentaire:
Enregistrer un commentaire